БОЛАЛАРДА АТОПИК ДЕРМАТИТ ОҒИРЛИГИНИНГ КЛИНИК-ИММУНОЛОГИК ХУСУСИЯТЛАРИ: УМУМИЙ IGE, ЭОЗИНОФИЛИЯ ВА ПОЛИСЕНСИБИЛИЗАЦИЯНИНГ АҲАМИЯТИ

Атопик дерматит болаларда кенг тарқалган сурункали яллиғланишли тери касаллиги бўлиб, унинг клиник кечиши ва оғирлик даражаси иммунологик фаоллик ҳамда аллергенларга сенсибилизация хусусиятлари билан боғлиқ. Тадқиқотнинг мақсади болаларда атопик дерматитнинг клиник оғирлиги билан умумий иммуноглобулин Е (IgE), периферик қон эозинофилияси ва сенсибилизация кўлами ўртасидаги муносабатларни баҳолашдан иборат бўлди. Тадқиқотга атопик дерматит ташхиси тасдиқланган 3–18 ёшли 200 нафар бола киритилди. Касаллик оғирлиги SCORAD индекси асосида баҳоланди, қон зардобида умумий IgE ва периферик қонда эозинофиллар миқдори аниқланди, аллергологик текширув асосида сенсибилизация хусусиятлари баҳоланди. Умумий IgE концентрацияси беморларнинг 76,0% да ёшга мос меъёрдан юқори бўлиб, енгил атопик дерматитда 154,2±61,8 IU/ml, ўрта оғир шаклда 312,7±104,6 IU/ml ва оғир шаклда 586,3±214,9 IU/ml ни ташкил этди (p<0,001). Эозинофилия 68,5% беморда аниқланиб, эозинофиллар миқдори касаллик оғирлиги ортиши билан 4,9±1,8% дан 10,2±3,1% гача кўтарилди (p<0,001). Умумий IgE билан SCORAD ўртасида r=0,61, эозинофиллар билан SCORAD ўртасида r=0,54, умумий IgE билан эозинофиллар ўртасида эса r=0,49 даражада мусбат корреляция аниқланди (p<0,001). Молекуляр сенсибилизация беморларнинг 91,0% да, полисенсибилизация эса 63,0% да қайд этилди. Олинган натижалар умумий IgE, эозинофилия ва сенсибилизация кўламини SCORAD билан комплекс баҳолаш болаларда атопик дерматитнинг клиник-иммунологик фенотипини тўлиқроқ тавсифлаш имконини беришини кўрсатди.