KOMBINATSIYALANGAN SPINAL-EPIDURAL ANESTEZIYADA GEMODINAMIK XAVFGA ASOSLANGAN PERSONALIZATSIYALANGAN PROTOKOLNING KLINIK SAMARADORLIGI

Maqsad. Ko‘p tuqqan anemiyali homiladorlarda kesar kesish vaqtida kombinatsiyalangan spinal-epidural anesteziya (KSEA) sharoitida gemodinamik xavfni oldindan stratifikatsiya qilishga asoslangan personalizatsiyalangan davolash-diagnostik protokolning klinik samaradorligini baholash.

Material va usullar. Prospektiv qiyosiy tadqiqotga turli etiologiyali anemiyasi bo‘lgan 146 nafar homilador kiritildi. Nazorat guruhidagi 72 nafar bemorda standart anesteziologik taktika, asosiy guruhdagi 74 nafar bemorda esa “SHIGUAN” integral shkalasi asosida gemodinamik xavfni stratifikatsiya qilish va unga mos infuzion-vazopressor qo‘llab-quvvatlash protokoli qo‘llanildi. Perioperatsion davrda o‘rtacha arterial bosim, yurak urish tezligi, SpO₂, gemodinamik stabilizatsiya vaqti, arterial gipotenziya, gemostaz ko‘rsatkichlari hamda davolash resurslariga bo‘lgan ehtiyoj baholandi.

Natijalar. Personalizatsiyalangan protokol qo‘llangan guruhda gemodinamik ko‘rsatkichlar barqarorroq bo‘lib, stabilizatsiyaga erishish vaqti qisqardi. Intraoperatsion gipotenziya chastotasi 43,1% dan 24,3% gacha kamaydi (p=0,009; OR=0,43; 95% ishonch oralig‘i 0,22-0,85). Shuningdek, vazopressor va infuzion yuklamaning kamayishi, gemostatik ko‘rsatkichlarning nisbatan yaxshi saqlanishi hamda statsionar davolanish muddatining qisqarishi kuzatildi.

Xulosa. Gemodinamik xavfni operatsiyadan oldin baholash va perioperatsion qo‘llab-quvvatlashni individual xavf darajasiga moslashtirish anemiyali ko‘p tuqqan homiladorlarda KSEA vaqtida gemodinamik beqarorlikni kamaytirish va davolash resurslaridan oqilona foydalanishga imkon beradi.