KLINIK VA NEYROVEGETATIV KO‘RSATKICHLARNING RAQAMLI MONITORINGI ASOSIDA PREDMENSTRUAL SEFALGIYALARNI ERTA TASHXISLASH VA PROGNOZLASHNI TAKOMILLASHTIRISH

Predmenstrual bosh og‘riqlari hayz siklining muayyan kunlarida bosh og‘rig‘ining paydo bo‘lishi yoki kuchayishi bilan namoyon bo‘ladigan muhim klinik-nevrologik muammo hisoblanadi. Ularning etiologiyasi gormonal o‘zgarishlar, neyromediator tizimidagi buzilishlar, vegetativ disfunksiya, uyqu buzilishlari va stress holatlari bilan bog‘liq bo‘lishi mumkin.

Tadqiqot maqsadi: Reproduktiv yoshdagi ayollarda predmenstrual sefalgiyalarni erta tashxislash va prognozlash usullarini takomillashtirish. Bunga klinik va neyrovegetativ ko‘rsatkichlarni kompleks raqamli monitoring qilish, bosh og‘rig‘i yuzaga kelishiga ta’sir etuvchi asosiy omillarni aniqlash hamda shaxsiylashtirilgan prognozlash algoritmini ishlab chiqish orqali erishish rejalashtirilmoqda.

Materiallar va usullar: Hayz sikli bilan bog‘liq takrorlanuvchi bosh og‘riqlari kuzatiladigan reproduktiv yoshdagi ayollarda prospektiv klinik-nevrologik tadqiqot o‘tkazish rejalashtirilmoqda. To‘plangan ma’lumotlar tavsifiy statistika, korrelyatsion va ko‘p omilli tahlil usullari yordamida o‘rganiladi. Ishlab chiqilgan modelning prognostik aniqligi ROC-tahlil orqali, sezgirlik, spetsifiklik va ROC egri chizig‘i ostidagi maydon (AUC) ko‘rsatkichlarini aniqlash asosida baholanadi.

Kutilayotgan natijalar: Predmenstrual sefalgiyalarning asosiy klinik-nevrologik xususiyatlarini, shuningdek, hayz siklining turli fazalarida bosh og‘rig‘ining intensivligi, davomiyligi va takrorlanish chastotasini aniqlash nazarda tutilmoqda. Bosh og‘rig‘ining ifodalanish darajasi, uyqu buzilishlari, psixoemotsional zo‘riqish va neyrovegetativ holat o‘rtasidagi ehtimoliy korrelyatsion bog‘liqliklarni aniqlash kutilmoqda.

Xulosa: Klinik va neyrovegetativ ko‘rsatkichlarning raqamli monitoringidan kompleks foydalanish predmenstrual sefalgiyalarni erta tashxislash va prognozlashni takomillashtirishning istiqbolli yo‘nalishi hisoblanadi.