KORONAR ARTERIYALARI STENTLANGAN VA STENTLANMAGAN 2-TUR QANDLI DIABET BILAN KASALLANGAN BEMORLARNING KARDIOMETABOLIK PROFILI: QIYOSIY KO‘NDALANG KESIMLI TADQIQOT

Ushbu koʻndalang tadqiqotda 2-tur qandli diabet (QD2) bilan kasallangan, koronar tomir stentlash anamnezi bor va boʻlmagan bemorlarning (50–70 yosh, 38 va 20 bemor) kardiometabolik profili yosh boʻyicha solishtirildi; triglitserid-glyukoza indeksi (TyG) va plazmaning aterogen indeksi (AIP) qoʻllanildi. Guruhlar oʻrtasida TyG indeksi (9,86 ± 0,74 va 9,82 ± 0,89, p = 0,858), AIP (0,35 ± 0,29 va 0,31 ± 0,43, p = 0,629), HbA1c va boshqa metabolik koʻrsatkichlar boʻyicha statistik ahamiyatli farq aniqlanmadi (barchasi p > 0,20). TyG indeksining yuqori darajasi (≥ 9,0) ikkala guruhda ham bir xil koʻp uchradi (88,2% va 80,0%). Kardiometabolik yuk stentlash mavjudligidan qatʼi nazar bir xil yuqori boʻldi, bu esa aniq ifodalangan insulinrezistentlik va aterogen dislipidemiya QD2 ning erta bosqichida shakllanishini va faqat ogʻir, stentlashni talab qiluvchi koronar kasallikka xos emasligini koʻrsatadi.