KO‘KRAK BEZI SARATONINI DIAGNOSTIKA VA DAVOLASHNING ZAMONAVIY JIHATLARI

Ko‘krak bezi saratoni zamonaviy onkologiyaning eng dolzarb muammolaridan biri bo‘lib, butun dunyo bo‘ylab ayollar orasida onkologik kasalliklar tarkibida yetakchi o‘rinlardan birini egallaydi. Erta tashxislash va davolash sohasida erishilgan sezilarli yutuqlarga qaramay, ushbu kasallik ayollar o‘rtasida o‘limga olib keluvchi xavfli o‘smalar orasida muhim o‘rin tutishda davom etmoqda. So‘nggi yillarda karsinogenezning molekulyar-biologik mexanizmlarini o‘rganishdagi yutuqlar diagnostika va davolashning individuallashtirilgan yondashuvlarini amaliyotga joriy etish imkonini berdi. Ushbu adabiyotlar sharhida ko‘krak bezi saratonining epidemiologiyasi, xavf omillari, molekulyar-genetik xususiyatlari, skrining va diagnostika usullari bo‘yicha zamonaviy ma’lumotlar tahlil qilingan. Shuningdek, jarrohlik davolash, nur terapiyasi, kimyoterapiya, gormonal terapiya, maqsadli (target) va immunoterapiyaning zamonaviy tamoyillari yoritilgan. Suyuq biopsiya, o‘smalarning molekulyar profillanishi hamda sun’iy intellekt texnologiyalarining qo‘llanilishi kabi istiqbolli yo‘nalishlar ko‘rib chiqilgan. Keltirilgan ma’lumotlar ko‘krak bezi saratoni bilan kasallangan bemorlarni davolashda kompleks va individual yondashuv zarurligini, bu esa davolash samaradorligini oshirish va bemorlar hayot sifatini yaxshilashga xizmat qilishini ko‘rsatadi.