PKIDAN КЕЙИН CRP ДИНАМИКАСИНИНГ КЛИНИК ВА ПРОГНОСТИК АҲАМИЯТИ

Ушбу тадқиқотнинг мақсади юрак ишемик касаллиги мавжуд беморларда перкутан коронар аралашувдан (ПКИ) кейин С-реактив оқсил (CRP) даражасининг динамикасини баҳолаш ҳамда унинг рестеноз, стент тромбози ва йирик ножўя юрак-қон томир ҳодисалари (MACE)ни прогноз қилишдаги аҳамиятини аниқлашдан иборат бўлди. Проспектив тадқиқотга ПКИ ўтказилган 102 нафар бемор киритилди. Барча беморларда CRP даражаси операциядан олдин, операциядан кейин 24 соат, 1 ой, 3 ой, 6 ой ва 9 ойда баҳоланди. Кузатув давомида ин-стент рестеноз, стент тромбози ва MACE ҳолатлари таҳлил қилинди. Тадқиқот натижаларига кўра, ПКИдан кейинги дастлабки 24 соатда CRP даражасининг энг юқори қиймати қайд этилди, кейинги кузатув босқичларида эса унинг изчил пасайиши кузатилди. Шу билан бирга, CRP даражасининг юқори сақланиб қолиши рестеноз, стент тромбози ва MACE ривожланиши хавфининг ортиши билан статистик жиҳатдан ишончли боғлиқ эканлиги аниқланди (p<0,05). Олинган натижалар CRPнинг ПКИдан кейинги беморларда муҳим прогностик биомаркер эканлигини кўрсатди. Унинг динамик мониторинги юқори хавфли беморларни эрта аниқлаш, клиник кузатувни индивидуаллаштириш ва ноқулай юрак-қон томир ҳодисаларини прогноз қилиш имконини беради.