KO‘RISH A’ZOSI OLDINGI SEGMENTI PATOLOGIYASINI KOMPLEKS TASHXISLASHDA ULTRATOVUSH BIOMIKROSKOPIYASINING O‘RNI

Ko‘z olmasining oldingi bo‘limi kasalliklari shox parda, oldingi kamera, rangdor parda, kipriksimon tana, gavhar, uning boylam apparati va oldingi kamera burchagini zararlovchi keng ko‘lamli patologiyalar guruhini o‘z ichiga oladi. Biomikroskopiya, gonioskopiya va tonometriya kabi klassik tekshiruv usullari yuqori informativlikka ega bo‘lsa-da, ayrim klinik holatlarda chuqur joylashgan va retroiridal tuzilmalar holatini to‘liq baholash imkonini bermaydi.

Ultratovush biomikroskopiyasi (UBM) zamonaviy vizualizatsiya usuli bo‘lib, shox parda, oldingi kamera, rangdor parda, kipriksimon tana, gavhar va uning boylam apparati o‘rtasidagi topografik-anatomik munosabatlarni batafsil baholash imkonini beradi. UBM ayniqsa glaukoma, iridotsiliar kompleks patologiyalari, gavhar sublyuksatsiyasi, travmadan keyingi o‘zgarishlar, rangdor parda va kipriksimon tana o‘smalari, ko‘z gipotoniyasi hamda operatsiyadan keyingi holatlarni tashxislashda katta ahamiyatga ega.

UBMni biomikroskopiya, gonioskopiya, optik kogerent tomografiya va boshqa instrumental tekshiruv usullari bilan birgalikda qo‘llash tashxisning ishonchliligini oshiradi, yashirin strukturaviy buzilishlarni aniqlashga yordam beradi va patologik jarayonning anatomik mohiyatini aniq belgilash imkonini yaratadi.

Mazkur tadqiqotning maqsadi ko‘z oldingi segmenti kasalliklari bo‘lgan bemorlarni kompleks tekshirishda ultratovush biomikroskopiyasining o‘rnini o‘rganish hamda diagnostika va davolash strategiyasini shakllantirishdagi klinik ahamiyatini baholashdan iborat.