TUXUMDONLAR DISFUNKSIYASI BO‘LGAN AYOLLARDA GORMONAL HOLATNI HISOBGA OLGAN HOLDA FIBROZ-KISTOZ MASTOPATIYANI DIFFERENSIAL DAVOLASH SAMARADORLIGI

Tuxumdonlar disfunksiyasi fonida rivojlanadigan fibroz-kistoz mastopatiya geterogen va gormonga bog‘liq holat bo‘lib, uning klinik kechishi ko‘p jihatdan gipotalamo-gipofizar-tuxumdon tizimidagi boshqaruv buzilishlariga bog‘liq. Lyutein fazasi yetishmovchiligi, anovulyator sikllar, estrogenlarning nisbiy ortiqligi, progesteron tanqisligi hamda prolaktin sekretsiyasidagi o‘zgarishlar sut bezi to‘qimalarida proliferativ jarayonlarni kuchaytiradi va standart, bir xil davolash sxemalarining samaradorligini pasaytiradi.

Tadqiqotning maqsadi tuxumdonlar disfunksiyasi mavjud bemorlarda fibroz-kistoz mastopatiyani individual gormonal xususiyatlarni hisobga olgan holda differensial yondashuv asosida davolash samaradorligini o‘rganishdan iborat. Davolash strategiyasining asosini klinik holatni har tomonlama baholash, reproduktiv va hayz holatini aniqlash, estradiol, progesteron, prolaktin, follikulani stimullovchi gormon (FSG) va lyuteinlashtiruvchi gormon (LG) darajalarini tekshirish, shuningdek, ultratovush tekshiruvi, so‘noelastografiya va mammografiya ma’lumotlarini tahlil qilish tashkil etadi.

Davolash taktikasini tanlash differensial tarzda amalga oshirilishi lozim. U aniqlangan gormonal nomutanosiblikni korreksiya qilish, tuxumdon disfunksiyasi turi hamda sut bezlaridagi strukturaviy o‘zgarishlarni hisobga olgan holda davolash choralarini individuallashtirishni nazarda tutadi. Davolash samaradorligi og‘riq sindromining kamayishi, diffuz va kistoz o‘zgarishlarning regressiyasi, gormonal profilning me’yorlashuvi hamda patologik jarayonning rivojlanish sur’ati pasayishi asosida baholanadi.

Personalizatsiyalangan yondashuv kasallikning patogenetik jihatdan turlicha kechishini hisobga olish imkonini beradi. Bu esa davolashning klinik samaradorligini oshirish, kasallik qaytalanish chastotasini kamaytirish hamda sut bezlari va tuxumdonlarning qo‘shma patologiyasi mavjud ayollarni uzoq muddatli kuzatishning maqbul tizimini shakllantirishga xizmat qiladi.