PREPUBERTAT YOSHDAGI HAYVONLARDA NOVVOYCHILIK ACHITQISI BILAN INDUKSIYA QILINGAN ISITMA KECHISHIGA CELAGRIP PREPARATINING TA'SIRINI BAHOLASH

Antipiretik faollikka ega yangi dori vositalarini yaratish va ularning samaradorligini baholash eksperimental farmakologiyaning dolzarb yo‘nalishlaridan biri hisoblanadi. Ayniqsa, prepubertat yoshdagi organizmlarda isitma bilan kechuvchi kasalliklarni xavfsiz va samarali davolash uchun yangi preparatlarni izlash muhim ilmiy-amaliy ahamiyatga ega. Isitmaning eksperimental modellari tadqiq qilinayotgan preparatlarning antipiretik samaradorligini, ta’sir davomiyligini hamda ularning amaliyotda keng qo‘llanilayotgan dori vositalari bilan qiyosiy samaradorligini baholash imkonini beradi. Tadqiqot tana vazni 60–75 g bo‘lgan prepubertat yoshdagi laboratoriya kalamushlarida o‘tkazildi. Eksperimental isitma modeli tana vazniga nisbatan 1 ml/100 g dozada 20 % li novvoychilik achitqisi suspenziyasini teri ostiga yuborish orqali yaratildi. Tadqiq etilayotgan CelAgrip preparati pirogen yuborilganidan 6 soat o‘tgach, ya’ni tana haroratining maksimal ko‘tarilishi kuzatilgan davrda, intragastral usulda bir marta 10, 25 va 50 mg/kg dozalarda qo‘llanildi. Taqqoslash preparati sifatida Ibuprofen xuddi shu dozalarda intragastral usulda yuborildi.

Hayvonlarning rektal tana harorati pirogen yuborilishidan oldin, undan 6 soat o‘tgach hamda preparatlar qo‘llanilganidan keyin keyingi 3 soat davomida har bir soatda o‘lchandi. Tadqiqot natijalari CelAgrip preparati yaqqol antipiretik faollikka ega ekanligini hamda uning samaradorligi pediatriya amaliyotida keng qo‘llaniladigan nosteroid yallig‘lanishga qarshi dori vositasi bo‘lgan Ibuprofen bilan taqqoslanadigan darajada ekanligini ko‘rsatdi. Olingan natijalar CelAgrip preparatini yallig‘lanish va isitma bilan kechuvchi kasalliklarni davolashda qo‘llash imkoniyatlarini baholashga qaratilgan keyingi doklinik va klinik tadqiqotlar uchun istiqbolli nomzod sifatida e’tirof etish imkonini beradi.