PREDIABETLI BEMORLARDA BUYRAK FUNKSIYASI BUZILISHLARINI KLINIK-LABORATOR BAHOLASH

Ushbu tadqiqotning maqsadi prediabet bilan og‘rigan bemorlarda buyrak funksiyasining buzilishlarini klinik va laborator baholashdan iborat bo‘ldi. Tadqiqot Andijon viloyati endokrinologiya dispanseri bazasida o‘tkazildi. Tekshiruvga 18–65 yoshdagi uglevod almashinuvi buzilishlari mavjud bo‘lgan 55 nafar bemor va 20 nafar sog‘lom shaxsdan iborat nazorat guruhi kiritildi. Bemorlar nahorgi glikemiya buzlishi, glyukozaga tolerantlik buzilishi hamda ushbu ikki holat birgalikda kuzatilgan guruhlarga ajratildi. Tadqiqot davomida umumiy klinik, biokimyoviy, gormonal va instrumental tekshiruv usullaridan foydalanildi. Natijalar prediabetli bemorlarda tana massa indeksi, sistolik arterial bosim, lipid almashinuvi ko‘rsatkichlari, C-reaktiv oqsil va kreatinin miqdorining nazorat guruhiga nisbatan sezilarli oshganini ko‘rsatdi (p<0,005). Prediabet holati aterosklerotik yurak-qon tomir kasalliklari, surunkali buyrak kasalligi va yurak yetishmovchiligi rivojlanishi uchun mustaqil xavf omili sifatida baholandi. Olingan natijalar prediabet bosqichidayoq buyrak funksiyasi va kardiorenal xavfni erta aniqlash hamda profilaktik chora-tadbirlarni amalga oshirish zarurligini ko‘rsatadi.