ГЎДАКЛАРДА ҚУСИШ СИНДРОМИНИНГ КЛИНИК ФЕНОТИПЛАРИ: КЛАСТЕР ТАҲЛИЛИ ВА НОЗОЛОГИК ВАЛИДАЦИЯ

Мақсад. Гўдакларда қусиш синдромининг клиник фенотипларини бирламчи кўрикда қайд этиладиган белгилар асосида, референс ташхисдан мустақил равишда ажратиш ва олинган фенотипларнинг нозологик шакллар билан мослигини баҳолаш. Материал ва усуллар. 2019-2025 йй. Кузатилган 89 нафар гўдак (0-12 ой) таҳлил қилинди; органик патология 52 нафарда (туғма гипертрофик пилоростеноз (ТГПС) - 42, дуоденал обструкция - 10), функционал бузилиш 37 нафарда аниқланди. Еттита клиник кўрсаткич бўйича тўлиқ маълумотга эга 66 нафар беморда k-means таснифлаш ўтказилди; референс ташхис таҳлилга киритилмади. Натижалар. Уч фенотип ажратилди (k=3; silhouette=0,337): функционал (n=19), пилорик обструкция (n=40) ва дистал обструкция (n=7); барча кўрсаткич бўйича фенотиплараро фарқ ишончли бўлди (p<0,002). Референс ташхис билан мослик 55/66 (83,3%; 95% ИО 72,6-90,4); органик патологияни ажратишда сезгирлик 97,4%, ўзига хослик 66,7%, манфий прогностик қиймат 94,7%. Госпитализация давомийлиги фенотиплар бўйича 6,06±2,48; 7,47±3,11 ва 18,14±7,24 кунни ташкил этди (p=0,0004). Хулоса. Гўдакларда қусиш синдромининг клиник манзараси ташхис ҳақидаги маълумотсиз ҳам нозологик тузилмани 83,3% аниқлик билан акс эттиради ва диагностик изланишнинг биринчи, сараловчи босқичи сифатида қўлланилиши мумкин.