2024-2025 YILLARDA O‘ZBEKISTONDA DONOR QONINI KONSERVATSIYALASH VA QON KOMPONENTLARI HAMDA PREPARATLARINI TAYYORLASH FAOLIYATINING QIYOSIY TAHLILI

So‘nggi yillarda O‘zbekistonda qon xizmatini takomillashtirish, donorlikni rivojlantirish va mahalliy qon preparatlari ishlab chiqarish hajmini oshirishga alohida e’tibor qaratilmoqda. Tadqiqotning maqsadi O‘zbekistonda 2024 va 2025 yillarda donor qonini konservatsiyalash, qon komponentlari hamda qon asosidagi ayrim biologik preparatlarni tayyorlash hajmlarini qiyosiy baholash iborat bo‘lib, buning uchun respublika qon xizmati bo‘yicha 2024 va 2025 yillarning yig‘ma statistik ma’lumotlari tahlil qilindi. 2025 yilda 2024 yilga nisbatan konservatsiyalangan qon hajmi 8,62% ga oshdi, yaroqlilik muddati tugagani sababli foydalanishdan chiqarilgan qon esa 12,0% ga kamaydi. Eritrotsitar massa 10,54%, plazma 6,46%, trombotsitar massa 31,3%, kriopretsipitat 4,5%, antistafilokokk plazmasi 2117,2% va stafilokokkka qarshi immunoglobulin 657,5% ga ko‘paydi. Inson normal immunoglobulini 520 doza tayyorlandi; 2024 yilda ishlab chiqarilmagan. Biroq 10% va 20% albumin mos ravishda 29,5% va 13,4%, antirezus immunoglobulini 19,7% ga kamaydi.