BOLDIR SUYAKLARI OCHIQ SINISHLARINI DAVOLASH SAMARADORLIGINI QIYOSIY BAHOLASH

Ochiq boldir suyaklari sinishlari tayanch-harakat tizimining eng og‘ir shikastlanishlaridan biri bo‘lib, infeksion asoratlar, suyak bitishining kechikishi hamda pastki ekstremita funksiyasining uzoq muddat buzilishi bilan kechadi. Shu sababli davolash samaradorligini oshirish va asoratlar sonini kamaytirishga qaratilgan usullarni takomillashtirish dolzarb masalalardan biri hisoblanadi.

Tadqiqot maqsadi. Ochiq boldir suyaklari sinishlari bo‘lgan bemorlarda davolash samaradorligini SF-36, LEFS va ASEPSIS shkalalari asosida qiyosiy baholash.

Materiallar va usullar. Tadqiqotga ochiq boldir suyaklari sinishlari bilan davolangan 102 nafar bemor kiritildi. Asosiy guruhni takomillashtirilgan davolash usuli qo‘llanilgan 55 nafar bemor, qiyoslash guruhini esa an’anaviy davolash olgan 47 nafar bemor tashkil etdi. Davolash natijalari SF-36, LEFS va ASEPSIS xalqaro validatsiyadan o‘tgan baholash shkalalari yordamida tahlil qilindi. Olingan ma’lumotlarga statistik ishlov berildi.

Natijalar. Takomillashtirilgan davolash usuli qo‘llanilgan bemorlarda ASEPSIS shkalasi bo‘yicha infeksion asoratlar kamroq kuzatildi, LEFS ko‘rsatkichlari bo‘yicha pastki ekstremita funksiyasi tezroq tiklandi hamda SF-36 so‘rovnomasining aksariyat ko‘rsatkichlari bo‘yicha hayot sifati an’anaviy davolash olgan bemorlarga nisbatan yuqori bo‘ldi.

Xulosa. Ochiq boldir suyaklari sinishlarini davolashda takomillashtirilgan usulni qo‘llash klinik va funksional natijalarni yaxshilaydi, operatsiyadan keyingi infeksion asoratlarni kamaytiradi hamda bemorlarning uzoq muddatli hayot sifatini oshiradi.