CHANOQ HALQASINING NOSTABIL SINISHLARIDA KICHIK CHANOQ ICHI QON KETISHLARINI DIAGNOSTIKA VA DAVOLASHNI TAKOMILLASHTIRISH

Chanoq halqasining nostabil sinishlari og‘ir politravmalar tarkibida eng yuqori o‘lim ko‘rsatkichlari bilan kechuvchi shikastlanishlardan biri hisoblanadi. Ayniqsa, kichik chanoq ichki qon ketishi bilan kechadigan holatlar gemorragik shok, ko‘p a'zoli yetishmovchilik va nogironlik rivojlanishining asosiy sabablaridan biri bo‘lib qolmoqda. Zamonaviy diagnostika usullarining takomillashishi va minimal invaziv gemostatik texnologiyalarni amaliyotga joriy etish ushbu toifadagi bemorlarda davolash natijalarini sezilarli yaxshilash imkonini bermoqda. Maqsad. Chanoq halqasining nostabil sinishlari bilan kechuvchi kichik chanoq ichki qon ketishlarini erta aniqlash, diagnostik algoritmni takomillashtirish hamda minimal invaziv ballonli tamponada usulining klinik samaradorligini baholash. Material va usullar. Tadqiqot 2017–2023 yillar davomida Respublika shoshilinch tibbiy yordam ilmiy markazi Buxoro filialida davolangan 198 nafar bemor ma'lumotlari asosida retrospektiv-prospektiv usulda bajarildi. Asosiy guruhga 97 nafar bemor, nazorat guruhiga esa 101 nafar bemor kiritildi. Klinik, laborator, ultratovush (FAST), rentgenologik, MSKT, angiografik, statistik va taqqoslovchi tahlil usullaridan foydalanildi.