ANTIBIOTIKLARGA CHIDAMLI SISTITDA METILEN KO‘KI BILAN ANTIMIKROB FOTODINAMIK TERAPIYA: EKSPERIMENTAL ASOSLAR VA KLINIK ISTIQBOLLAR

Ushbu sharhda antibiotiklarga chidamli bakterial sistitda metilen ko‘ki yordamida antimikrob fotodinamik terapiyani (aFDT) qo‘llashning ilmiy asoslari tahlil qilindi. Fotokimyoviy ta’sir mexanizmi, plankton mikroorganizmlar va bioplyonkalarning sezuvchanligi, siydik pufagi infeksiyasining eksperimental modellari hamda klinik qo‘llash cheklovlari yoritildi. In vitro tajribalar antibiotiklarga chidamli Escherichia coli shtammlarining faolligi pasayishini ko‘rsatadi, biroq bioplyonkalarga ta’sir qilish uchun boshqa sharoitlar talab etiladi. Kalamush modelida metilen ko‘ki va kaliy yodid kombinatsiyasi infeksiya davomiyligini qisqartirgan, ayrim hollarda qaytalanish kuzatilgan. Sistitda intravezikal aFDT samaradorligini tasdiqlovchi klinik dalillar hozircha yetarli emas. Mikrobiologik natijalar, uroteliy holati va xavfsizlikni tizimli baholash zarur.