PREMENOPAUZA DAVRIDA BACHADONDAN ANOMAL QON KETISHINI TASHXISLASH VA DAVOLASHNING ZAMONAVIY YONDASHUVLARI

Tadqiqot premenopauza davridagi bachadondan anomal qon ketish (BAQK)ning klinik, gormonal, metabolik va morfologik xususiyatlarini baholash hamda tashxislash va davolash yondashuvlarini optimallashtirishga qaratildi. 2021–2025 yillarda 500 nafar BAQK bilan murojaat qilgan premenopauzal ayol va 100 nafar nazorat guruhi ishtirokchisi tekshirildi. Klinik-anamnestik, laborator, transvaginal ultratovush, gisteroskopik, gistologik va immunogistokimyoviy usullar qo‘llanildi. BAQKning eng yuqori ulushi 48–50 yosh guruhida kuzatildi. Endometriyal giperplaziya, mioma, polip, adenomioz va funksional qon ketishlar aniqlanishi etiologik jihatdan ko‘p omilli tabiatni ko‘rsatdi. Yosh, semizlik, yuqori stress, reproduktiv anamnez va metabolik buzilishlar xavf omillari sifatida qayd etildi. Klinik, laborator va instrumental ma’lumotlarni integratsiyalovchi yangi diagnostik algoritmning sezgirligi 93%, o‘ziga xosligi 89%, umumiy aniqligi 91% bo‘ldi. Individual davolash modeli asosida umumiy samaradorlik 88%ni tashkil etdi, 6 oylik kuzatuvda qaytalanish 14%gacha kamaydi. Natijalar premenopauzal BAQKda kompleks va individual yondashuvning amaliy ahamiyatini ko‘rsatadi.