MENOPAUZADAN KEYINGI DAVRDA SUT BEZI SARATONI RIVOJLANISHIDA GORMONAL TERAPIYANING AHAMIYATI

Maqolada postmenopauza davridagi ayollarda menopauzal gormonal terapiyaning sut bezi saratoni rivojlanish xavfiga ta’siri ko‘rib chiqilgan. Estrogen va gestagenlarning sut bezi to‘qimasidagi gormonga bog‘liq jarayonlarga ta’siri haqidagi zamonaviy ma’lumotlar tahlil qilingan.

Estrogen monoterapiyasi va estrogen-gestagen kombinatsiyalangan terapiyasi o‘rtasidagi farqlar, davolash davomiyligi, ayolning yoshi hamda menopauza boshlanganidan keyin terapiyani boshlash muddati alohida baholangan. Sut bezi saratoni xavfiga ta’sir ko‘rsatishi mumkin bo‘lgan irsiy moyillik, ortiqcha tana vazni, reproduktiv anamnez, sut bezlari to‘qimasining zichligi va hamroh kasalliklar kabi omillar yoritilgan. Gormonal terapiyaning sut bezi saratoni xavfiga ta’siri qo‘llanilayotgan preparat tarkibi va davolash davomiyligiga qarab farqlanishi ta’kidlangan.

Terapiyani boshlashdan oldin har bir ayolda foyda va mumkin bo‘lgan xavflarni individual baholash, davolash davomida esa muntazam mammologik nazorat o‘tkazish zarurligi asoslangan. Postmenopauza davrida gormonal terapiyani tanlashda individual yondashuvning ahamiyati ko‘rsatib berilgan.